ພູເບ້ຍສູງພຽງຟ້າ ສວຍເດັ່ນງາມຕາ ປ່າໄມ້ດົກໜາ ພູຜາອ້ອມບັງ ເປັນດ່ານລົມໜາວ ຊາວເມືອງປະສົມເຜົ່າ ຖ້ຳເຈົ້າອະນຸວົງຄົງໄວ້ ແດນເຊື້ອວິລະຊົນ.

ເມນູຊ້າຍ

ລາຍການຕ່າງໆ

ແຜນທີ່ຂອງແຂວງ


ລັດຖະມົນຕີປະຈໍາສໍານັກງານນາຍົກລັດຖະມົນຕີ ເຂົ້າຮ່ວມພິທີກິນຈຽງຢູ່ທີ່ ແຂວງໄຊສົມບູນ

ຂປລ. ໃນທີ 19 ທັນວາ 2017 ຢູ່ທີ່ບ້ານ ຫີນສໍ ເມືອງລ້ອງຊານ ແຂວງໄຊສົມບູນ, ໄດ້ຈັດພິທີເປີດງານບຸນກິນຈຽງ ຫລື ບຸນປີໃໝ່ຂອງຊົນເຜົ່າມົ້ງ, ໂດຍການເປັນປະທານຂອງ ທ່ານ ຕົ່ງ ມົວ ຊົວໂກ້ ເຈົ້າ ເມືອງລ້ອງຊານ ແຂວງໄຊສົມບູນ, ໃຫ້ກຽດເຂົ້າຮ່ວມພິທີ ມີ ທ່ານ ຈະເລີນ ເຢຍປາວເຮີ ລັດຖະມົນຕີປະຈໍາສຳນັກງານ ນາຍົກລັດຖະມົນຕີ, ທ່ານ ຄໍາໃບ ດໍາລັດ ຮອງປະທານສູນກາງ ແນວລາວສ້າງຊາດ, ບັນດາອໍານາດການປົກຄອງແຂວງ, ເມືອງ ແລະ ປະຊາຊົນຊາວເມືອງລ້ອງຊານ ເຂົ້າຮ່ວມ.

ໃນໂອກາດກ່າວເປີດພິທີ ທ່ານ ຕົ່ງ ມົວ ຊົວໂກ້ ໄດ້ລາຍງານໃຫ້ຊາບກ່ຽວກັບ ສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງເມືອງລ້ອງຊານ ໃນໄລຍະ 1 ປີ ທີ່ຜ່ານມາ ເຫັນວ່າ: ມີສະຖຽນລະພາບ ທາງດ້ານການເມືອງ, ສັງຄົມມີຄວາມສະຫງົບປອດໄພ, ໜັກແໜ້ນ ແລະ ເຂັ້ມແຂງ; ເສດຖະກິດມີການຂະຫຍາຍຕົວຢ່າງຕໍ່ເນື່ອງ ຢູ່ໃນລະດັບ 7,5% ຕໍ່ປີ, ການຜະລິດສະບຽບອາຫານ ຕິດພັນກັບການຜະລິດ ເປັນສິນຄ້າຂອງປະຊາຊົນ ກໍ່ມີທ່ວງທ່າຂະຫຍາຍຕົວ. ພ້ອມດຽວກັນນີ້, ກໍ່ໄດ້ມີການຈັດຕັ້ງປະຕິບັດ ວຽກງານຫັນລົງກໍ່ສ້າງຮາກຖານ ຕິດພັນກັບການສ້າງຂະບວນ ການແຂ່ງຂັນຮັກຊາດ, ສ້າງບ້ານພັດທະນາ ແລະ ຊຸກຍູ້ວຽກງານ 3 ສ້າງ ຕາມ 4 ເນື້ອໃນ 4 ຄາດໝາຍ ໃຫ້ເຂົ້າສູ່ລວງເລິກຕົວຈິງ ນັບມື້ນັບຫລາຍຂຶ້ນ.

ສໍາລັບງານບຸນກິນຈຽງ ຫລື ບຸນປີໃໝ່ ຂອງຊົນເຜົ່າມົ້ງເມືອງລ້ອງຊານນີ້ ແມ່ນເພື່ອເປັນການ ສະເຫລີມສະຫລອງ ພາຍຫລັງທີ່ປະຊາຊົນ ໄດ້ເກັບກູ້ຜົນຜະລິດ, ເຂົ້າໄຮ່-ເຂົ້ານາ ຂອງຕົນສໍາເລັດໃນໄລຍະ 1 ປີຜ່ານ ມາເຊິ່ງການຈັດພິທີດັ່ງກ່າວ, ແມ່ນໄດ້ມີການຈັດຕັ້ງປະຕິບັດ ມາແຕ່ບູຮານນະການ ກາຍມາເປັນຮີດຄອງປະເພນີຂອງເຜົ່າມົ້ງ ແລະ ສືບທອດມາຈົນເຖິງປັດຈຸບັນ, ເຊິ່ງປະເພນີກິນຈຽງ ຈະຈັດເປັນ 3 ໄລຍະ ຄື: ຫົວໜ້າຄອບ ຄົວຈະເປັນຜູ້ປັດສິ່ງທີ່ບໍ່ດີ, ຄວາມທຸກຍາກໃນຄອບຄົວ ແລະ ໄປສົ່ງທ້າຍປີເກົ່າຕ້ອນຮັບປີໃໝ່ ຢູ່ໃນຈຸດລວມຂອງແຕ່ລະຊິງຊາວ, ໄລຍະທີ່ຫົວໜ້າຄອບຄົວ ໄດ້ມາເອີ້ນຂວັນຢູ່ເຮືອນ ໃຫ້ແຕ່ລະຄົນໃນຄອບຄົວ ໃຫ້ຢູ່ດີມີແຮງ, ປັດເປົ່າສິ່ງທີ່ບໍ່ດີ ອອກໄປຈາກຄອບຄົວ ແລະ ມີການເຮັດພາເຂົ້າສາມັກຄີໃນຄອບຄົວ ເອີ້ນກັນວ່າ: ຈຽງໄກ່, ໄລຍະພົບປະສ້າງສັນກັບ ຜູ້ເຖົ້າ-ຜູ້ແກ່ຊິງຊາວ, ພົບປະສ້າງສັນ ລະຫວ່າງໝູ່ຄູ່, ບ່າວສາວ, ໂດຍການໂຍນໝາກຄອນ ເພື່ອຜູກມັດຄວາມສາມັກຄີຮັກແພງເຊິ່ງກັນ ແລະ ກັນ. ພ້ອມດຽວກັນນັ້ນ, ຍັງມີການສະແດງສິລະປະ ແລະ ສ້າງຂະບວນການກິລາ ທີ່ເປັນເອກະລັກຂອງຊົນເຜົ່າມົ້ງ ເຊັ່ນ: ຂັບລໍາເຜົ່າມົ້ງ, ເປົ່າປີ່, ເປົ່າແຄນ, ງົວຊົນງົວ, ຕີໝາກຂ່າງ, ຍິງໜ້າເກັກ ແລະ ອື່ນໆ

ໃນໂອກາດເຂົ້າຮ່ວມພິທີໃນຄັ້ງນີ້, ທ່ານ ຈະເລີນ ເຢຍປາວເຮີ ກໍ່ໄດ້ມີຄໍາເຫັນຕໍ່ອໍານາດການປົກຄອງ ກໍ່ຄື ປະຊາຊົນຊາວເມືອງລ້ອງຊານ ເຊິ່ງກ່ອນອື່ນໝົດ ທ່ານໄດ້ສະແດງຄວາມຍ້ອງຍໍຊົມເຊີນຕໍ່ຜົນງານທີ່ ເມືອງລ້ອງຊານ ສາມາດຍາດມາໄດ້ ໃນໄລຍະໜຶ່ງປີຜ່ານມາ ອັນເປັນການປະກອບສ່ວນສໍາຄັນເຂົ້າໃນການພັດ ທະນາເສດຖະກິດ-ສັງຄົມ ຂອງແຂວງໄຊສົມບູນ ກໍ່ຄື ປະເທດຊາດ ໃຫ້ມີການຂະຫຍາຍຕົວຢ່າງຕໍ່ເນື່ອງ. ພ້ອມດຽວກັນນີ້, ກໍ່ໃຫ້ສືບຕໍ່ຮັກສາມູນເຊື້ອ, ຄວາມສາມັກຄີ ແລະ ຮີດຄອງປະເພນີອັນດີງາມ ຂອງຊົນເຜົ່າມົ້ງ ໄວ້ຕໍ່ໄປ ທັງນີ້ກໍ່ເພື່ອພ້ອມກັນ ສ້າງໃຫ້ເມືອງລ້ອງຊານ ມີຄວາມໜັກແໜ້ນ, ເຂັ້ມແຂງ ແລະ ມີການພັດທະນາໃນທຸກດ້ານ, ປະຊາຊົນຫລຸດພົ້ນ ອອກຈາກຄວາມທຸກຍາກ ແລະ ມີໃບໜ້າອັນໃໝ່. ເຊິ່ງການຈັດພິທີບຸນກິນຈຽງ ຂອງຊົນເຜົ່າມົ້ງ, ເມືອງລ້ອງຊານໃນຄັ້ງນີ້ ຈະໄດ້ດໍາເນີນໄປ ແຕ່ວັນທີ 19-23 ທັນວັນ 2017.

ແຈ້ງການ

ສະຖິຕິຜູ້ເຂົ້າຊົມເວັບໄຊ

ມື້ນີ້ມື້ນີ້11
ມື້ວານນີ້ມື້ວານນີ້17
ທິດນີ້ທິດນີ້58
ເດືອນນີ້ເດືອນນີ້286
ລວມທັງໝົດລວມທັງໝົດ1802

ລ໊ອກອິນເຂົ້າສູ່ລະບົບ