ພູເບ້ຍສູງພຽງຟ້າ ສວຍເດັ່ນງາມຕາ ປ່າໄມ້ດົກໜາ ພູຜາອ້ອມບັງ ເປັນດ່ານລົມໜາວ ຊາວເມືອງປະສົມເຜົ່າ ຖ້ຳເຈົ້າອະນຸວົງຄົງໄວ້ ແດນເຊື້ອວິລະຊົນ.

ເມນູຊ້າຍ

ລາຍການຕ່າງໆ

ແຜນທີ່ຂອງແຂວງ


ເຮືອນເກົ່າວັງປາວ

ເຮືອນເກົ່າວັງປາວ ເປັນສະຖານທີ່ໜຶ່ງທີ່ມີຄວາມສຳຄັນ ທາງດ້ານປະຫວັດສາດການຕໍ່ສູ້ກູ້ຊາດ ແລະ ມີລັກສະນະທາງດ້ານສະຖາປັດຕະຍະກຳຂອງອາຄານແບບຝຣັ່ງ ເຊິ່ງຖືກສ້າງຂຶ້ນໃນປີ ຄສ 1966 ໂດຍແມ່ນນາຍພົນວັງປາວເປັນຜູ້ນຳພາໃນການສ້າງ ໃນປາງສົງຄາມຕໍ່ຕ້ານການຮຸກຮານ ຂອງຈັກກະພັດລ່າເມືອງຂຶ້ນແບບໃຫມ່ ແລະ ລູກແຫລ່ງຕີນມືຂອງພວກມັນ ເຊິ່ງເຮືອນຫລັງດັ່ງກ່າວກໍ່ເປັນໜຶ່ງໃນບັນດາເຮືອນພັກອາໄສຂອງນາຍພົນວັງປາວ ແລະ ບັນດາແກນນຳຂອງສັດຕູໃນສະໄໝນັ້ນ ເປັນເຮືອນ 2 ຊັ້ນ ປະກອບມີ 21 ຫ້ອງ. ປະຈຸບັນເຮືອນຫລັງດັ່ງກ່າວ ໄດ້ກາຍມາເປັນອະນຸສອນສະຖານທີ່ສຳຄັນໃນການສຶກສາອົບຮົມຄົນຮຸ່ນຫລັງ ໃຫ້ເຫັນເຖິງໂທດກຳຂອງພວກຂາຍຊາດທີ່ສ້າງໄວ້ຕໍ່ ປະຊາຊົນລາວບັນດາເຜົ່າໃນອະດີດ.

ເຮືອນເກົ່າວັງປາວ ຕັ້ງຢູ່ໃຈກາງຂອງເທດສະບານເມືອງລ້ອງແຈ້ງ ແຂວງໄຊສົມບູນ ເຊິ່ງອະນຸຍາດໃຫ້ເຂົ້າຊົມສະເພາະໃນວັນ ແລະ ເວລາລາດຊະການເທົ່ານັ້ນ.

ເດີ່ນບິນເກົ່າເມືອງລ້ອງແຈ້ງ

ເດິ່ນບິນເກົ່າເມືອງລ້ອງແຈ້ງ ເປັນສະຖານທີ່ໜຶ່ງທີ່ມີຄວາມສຳຄັນທາງດ້ານປະຫວັດສາດ, ເຊິ່ງເປັນສະຖານ ທີ່ຍຸດທະສາດໃນການຕໍ່ສູ້ສົງຄາມແບບໃໝ່ ໃນສະໄໝກ່ອນປີ ຄ.ສ 1975 ໂດຍສະເພາະເປັນສະຖານທີ່ຮອງຮັບການຂົນສົ່ງອາວຸດສົງຄາມ, ສະບຽງອາຫານ ແລະ ກຳລັງທະຫານທີ່ເປັນລູກແຫລ່ງຕີນມື ຂອງພວກຈັກກະພັດອາເມຮິກາເພື່ອຕໍ່ສູ້ກັບຝ່າຍແນວລາວ. ເດີ່ນບິນເກົ່າເມືອງລ້ອງແຈ້ງຕັ້ງຢູ່ໃຈກາງເມືອງລ້ອງແຈ້ງ ມີຄວາມຍາວ 1,700 ແມັດ, ກວ້າງປະມານ 15 ແມັດ, ປູດ້ວຍຢາງ 7 ຊັ້ນ, ມີຄວາມໜາ 40 ຊັງຕີແມັດ, ປະກອບມີ 4 ລານເປັນບ່ອນຈອດຍົນຢູ່ຕາມແຄມເດີ່ນ ແລະ ຫົວເດີ່ນເປັນບ່ອນພັກເຊົາ, ມີຫ້ອງການຈຳນວນ 3 ຫລັງ, ມີສະຖານທີ່ຫລິ້ນກິລາ, ມີໂຮງໝໍ, ເຮືອນຄົວ, ມີແມັກ, ສາງແກັບ, ເຄື່ອງນຸ່ງຖື, ມີສາງເກັບມ້ຽນນ້ຳມັນຍົນ ແລະ ອາວຸດຕ່າງໆ. ນອກນີ້ຢູ່ແຄມເດີ່ນຍັງມີຫໍຄອຍເພື່ອເປັນບ່ອນເຕືອນສັນຍານ, ລັກສະນະຂອງເດີ່ນເປັນຄ້ອຍຊັນລົງເລັກນ້ອຍ ເພື່ອໃຫ້ຍົນແລ່ນຂຶ້ນ-ລົງໄດ້ຍ່າງສະດວກ ແລະ ປອດໄພ.

ເດີ່ນບິນດັ່ງກ່າວ ຖືກສ້າງຂຶ້ນໃນປີ ຄ.ສ 1962 ແລະ ສຳເລັດໃນປີ ຄ.ສ 1964 ໂດຍແມ່ນນັກວິ ສະວະກອນຈາກປະເທດພິລິບປິນເປັນຜູ່ນຳພາກໍ່ສ້າງ. ຈຸດປະສົງສ້າງເດິ່ນບິ່ນ ແມ່ນເພື່ອເປັນບ່ອນຮັບໃຊ້ພາຫະນະຂົນສົ່ງທາງອາກາດ ເຂົ້າໃນຍຸດທະສາດການຕໍ່ສູ້ເພື່ອຫວັງຍຶດເອົາສອງແຂວງ ໂດຍສະເພາະແຂວງຊຽງຂວາງ ແລະ ແຂວງຫົວພັນ ເຊີ່ງມີຍົນທັງໝົດ 11 ປະເພດ ໃນນັ້ນມີ: T28 ຈຳນວນ 12 ລຳ, ລາວໂກຕາ C121, C122 ຊະນິດລະ 12 ລໍາ ແລະ C123ຂະນາດໃຫຍ່ 4 ໝາກປີ່ນ ຈໍານວນ 4 ລໍາ ເປັນເຄື່ອງບິນສອດແນມ ຫລືວ່າສື່ເປົາໝາຍ, ນອກນີ້ ຍັງມີລາວໂກແຕ H3C, ວີເວີ, ປອກເຕີ, ຊຸບເປີເບັ່ນ, ເອລີກອບແຕະ ຈໍານວນລະ 12 ລໍາ ແລະ ມີເຄື່ອງບິນສ່ວນຕົວ ຈຳນວນ 6 ລໍາ ມີ H34 ຈໍານວນ 2 ລໍາ, ລາກຸຕາ 2 ລໍາ ບໍ່ຮູ້ຊື່ 2 ລໍາ, ພາຍຫລັງໄດ້ຮັບການປົດປ່ອຍປີ 1975 ເປັນຕົ້ນມາເຖີງປະຈຸບັນ ເປັນເດີ່ນຫ້າງ.

ແຈ້ງການ

ສະຖິຕິຜູ້ເຂົ້າຊົມເວັບໄຊ

ມື້ນີ້ມື້ນີ້10
ມື້ວານນີ້ມື້ວານນີ້17
ທິດນີ້ທິດນີ້57
ເດືອນນີ້ເດືອນນີ້285
ລວມທັງໝົດລວມທັງໝົດ1801

ລ໊ອກອິນເຂົ້າສູ່ລະບົບ