ສະພາປະຊາຊົນ ແຂວງໄຊສົມບູນ ໄຂກອງປະຊຸມ ສະໄໝສາມັນ ເທື່ອທີ X ຊຸດທີ I

17/12/2020

ສະພາປະຊາຊົນ ແຂວງໄຊສົມບູນ ໄຂກອງປະຊຸມ ສະໄໝສາມັນ ເທື່ອທີ X ຊຸດທີ I

ສະພາປະຊາຊົນ ແຂວງໄຊສົມບູນ ໄຂກອງປະຊຸມ ສະໄໝສາມັນ ເທື່ອທີ X ຊຸດທີ I

    ກອງປະຊຸມສະໄໝສາມັນ ເທື່ອທີ X ຂອງສະພາປະຊາຊົນ ແຂວງໄຊສົມບູນ ຊຸດທີ I ໄດ້ໄຂຂຶ້ນຢ່າງເປັນທາງການໃນວັນທີ 22 ທັນວາ ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຂອງທ່ານ ບຸນສຸກ ຈອມວິສານ ປະທານສະພາປະຊາຊົນ ແຂວງໄຊສົມບູນ ເປັນກຽດເຂົ້າຮ່ວມຂອງທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ, ມີຮອງເຈົ້າແຂວງ, ການນຳພັກ-ລັດ, ອາດີດການນຳແຂວງ, ຄະນະປະຈຳສະພາ, ສະມາຊິກສະພາປະຈຳເຂດເລືອກຕັ້ງທີ 18, ສະມາຊິກສະພາປະຊາຊົນແຂວງ, ພະນັກງານອາວຸໂສບຳນານ, ຜູ້ຊົງຄຸນວຸດທິ ແລະ ນາຍບ້ານ 2 ບ້ານເທດສະບານ ເຂົ້າຮ່ວມ.

ໃນໂອກາດກ່າວສູນທອນພົດ ເປີດກອງປະຊຸມ ຂອງທ່ານ ບຸນສຸກ ຈອມວິສານ ປະທານສະພາປະຊາຊົນແຂວງ ທ່ານໄດ້ຍົກໃຫ້ເຫັນເຖິງສິ່ງທ້າທາຍ ຕະຫລອດໄລຍະປີ 2020 ຜ່ານມາ ເຫັນວ່າສະພາບການໃນທົ່ວປະເທດ ກໍຄືແຂວງໄຊສົມບູນ ໄດ້ປະເຊີນໜ້າກັບການລະບາດຂອງພະຍາດໂຄວິດ 19 ເຮັດໃຫ້ເສດຖະກິດມີການຂະຫຍາຍຕົວຊ້າ ບັນດາຫົວໜ່ວຍທຸລະກິດຕ່າງໆໄດ້ຮັບປະກົດການຫຍໍ້ທໍ້.

    ກອງປະຊຸມສະໄໝສາມັນ ເທື່ອທີ X ຂອງສະພາປະຊາຊົນ ແຂວງໄຊສົມບູນ ຊຸດທີ I ຈະໄດ້ສຸມໃສ່ພິຈາລະນາບັນຫາທີ່ສຳຄັນຂອງແຂວງ ເປັນຕົ້ນ ພິຈາລະນາຮັບຮອງການສະເໜີແຕ່ງຕັ້ງບຸກຄະລາກອນ ຕາມການສະເໜີຂອງອົງການປົກຄອງແຂວງ, ພິຈາລະນາ ແລະ ຮັບຮອງຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 5 ປີ ຜ່ານມາ ( 2016-2020 ) ແລະ ທິດທາງແຜນການ ປີ 2021-2025, ພິຈາລະນາຮັບຮອງເອົາບົດລາຍງານຂອງອົງການກວດສອບປະຈຳພາກກາງ ກ່ຽວກັບຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2019 ແລະ ບົດລາຍງາຍຂອງອົງການກວດກາລັດຂອງແຂວງ, ພິຈາລະນາ ແລະ ຮັບຮອງເອົາບົດລາຍງານຂອງອົງການໄອຍະການປະຊາຊົນແຂວງ, ສານປະຊາຊົນແຂວງ ກ່ຽວກັບການຈັດຕັ້ງປະຕິບັດວຽກງານ ປະຈຳປີ 2020 ແລະ ທິດທາງແຜນການປີ 2021, ພິຈາລະນາ ແລະ ຮັບຮອງເອົາລາຍງານການຈັດຕັ້ງປະຕິບັດວຽກງານ 5 ປີ ຜ່ານມາ ( 2016- 2020 ) ແລະ ທິດທາງແຜນການປະຈຳປີ 2021, ສະເໜີຮ່າງທິດທາງແຜນການ 5 ປີ ( 2021-2025 ) ຂອງສະພາປະຊາຊົນແຂວງ.

    ຈາກນັ້ນກອງປະຊຸມໄດ້ຮັບຟັງບົດລາຍງານ ຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂອງລັດ ປະຈຳປີ 2020 ແລະ ທິດທາງແຜນການປະຈຳປີ 2021 ຈາກທ່ານ ພົຕ ຄຳລຽງ ອຸທະໄກສອນ ຊຶ່ງຕະຫລອດໄລຍະ 1 ປີ ຜ່ານມາ ການພັດທະນາເສດຖະກິດ-ສັງຄົມ ຂອງແຂວງຂະຫຍາຍຕົວຕໍ່ເນື່ອງ ຢູ່ໃນລະດັບ 5%, ລວມຍອດຜະລິດຕະພັນພາຍໃນ ( GDP ) ບັນລຸໄດ້ 1.079,63ຕື້ກີບ ທຽບໃສ່ແຜນ (7%) ເທົ່າກັບ 97,8%, ສະເລ່ຍໃສ່ຫົວຄົນໄດ້ 11.383.151 ກີບ/ຄົນ/ປີ, ຂະແໜງກະສິກໍາຂະຫຍາຍຕົວ 5,8%, ຂະແໜງອຸດສາຫະກໍາ4,5%, ຂະແໜງບໍລິການ 3,5%, ມູນຄ່າການນໍາເຂົ້າ-ສົ່ງອອກສິນຄ້າ ປະຕິບັດໄດ້ 96.652 ໂດລາ ເທົ່າກັບ 19,33% ຂອງແຜນການປີ,ມູນຄ່າການຜະລິດອຸດສາຫະກຳ ແລະ ຫັດຖະກຳໄດ້ 37,54 ຕື້ກີບ ເທົ່າກັບ 151,19% ຂອງແຜນການປີ.

    ພ້ອມກັນນັ້ນ ທ່ານ ຄໍາແດງ ສີລາວົງ ສະມາຊິກສະພາປະຈຳເຂດເລືອກຕັ້ງທີ 18 ປະທານຄະນະກຳມະການເສດຖະກິດ-ແຜນການ ແລະ ການເງິນ ຕາງໜ້າຄະນະປະຈຳສະພາປະຊາຊົນແຂວງ ໄດ້ປະກອບຄຳເຫັນຕໍ່ບົດລາຍງານຂອງອົງການປົກຄອງແຂວງ, ອົງການກວດສອບປະຈຳພາກກາງ ແລະ ອົງການກວດກາລັດ ແຂວງ. ພ້ອມນີ້ ກອງປະຊຸມຍັງຈະໄດ້ຮັບຟັງການຊີ້ແຈງ ແລະ ປະກອບຄຳເຫັນຂອງພະແນກການທີ່ກ່ຽວຂ້ອງ ໃນລະຂົງເຂດວຽກງານແຕ່ລະດ້ານຕື່ມອີກ. ກອງປະຊຸມຄັ້ງນີ້ ຈະດຳເນີນເປັນເວລາ 2 ວັນ ຈຶ່ງຈະສຳເລັດ.

 

 

ໂທລະພາບ ແຂວງ ໄຊສົມບູນ
ແຜນທີ ແຂວງໄຊສົມບູນ
ເບີໂທສຸກເສີຍຂອງ ແຂວງ
ໜັງສືພີມ ປະຊາຊົນ
ໜັງສືພີມເສດຖະກີດ ແລະ ການຄ້າ